Video Palestinalied de Qntal 2025 Lyrics Lyrics

Qntal - Palestinalied Lyrics

Nu allerst lebe ich mir werde,
sît mîn sündic ouge sihet
daz reine lant und ouch die erde
den man so' vil êren giht.
nû ist geschehen des ich ie bat,
ich bin komen an die stat
dâ got mennischlîchen trat.

Schöniu lant rîch unde hêre,
swaz ich der noch hân gesehen,
sô bist dûz ir aller êre:
waz ist wunders hie geschehen!
daz ein magt ein kint gebar
hêre über aller engel schar,
waz daz niht ein wunder gar?

Hie liez er sich reine toufen,
daz der mensche reine sî.
dô liez er sich hie verkoufen,
daz wir eigen wurden frî.
anders waeren wir verlorn:
wol dir, sper, kriuz unde dorn!
wê dir, heiden! deist dir zorn.

Hinnen fuor der sun zer helle
von dem grabe, dâ er inne lac.
des was ie der vater geselle
und der geist, den niemen mac
sunder scheiden: êst al ein,
sleht und ebener danne ein zein,
als er Abrahâme erschein.

In diz lant hât er gesprochen
einen angeslîchen tac.
dâ diu witwe wirt gerochen
und der weise klagen mac
und der arme den gewalt,
der dâ wirt an ime gestalt.
wol ime dort, der hie vergalt!